عزومة

عصير قمر الدين
بما أننا اخترنا أن يكون معانا في الأسبوع الأول من رمضان أكلات من المطبخ المصري، يبقى هتلاقي إن أهم حاجة بتميز السفرة المصرية في رمضان هو؛ وجود كاسات عصير قمر الدين على السفرة، ودي أبسط طريقة لعمل العصير..

المقادير:

1/2 لفة قمر الدين مقطعة قطعاً صغيرة
1/2 كوب مشمش مجفف
1/2 كوب سكر
3 أكواب مية
مكعبات ثلج "اختياري"

الطريقة:
انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كاسات العصير وضيفي إليه مكعبات الثلج.



***************



شوربة الخضار بالشعرية شوربة الخضار بالشعرية
على فكرة الطبق ده طعمه حلو جداً، وكمان خفيف على المعدة في رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل اللي ممكن يفقدها بسبب الصيام، ودي أسهل طريقة لعمل شوربة الخضار...

المقادير:

1/4 كيلو بسلة
1/4 كيلو فاصوليا خضراء
2 حبة جزر مقطعة مكعبات متوسطة الحجم
2 حبة بطاطس مقطعة مكعبات متوسطة الحجم
2 حبة كوسا مقطعة مكعبات متوسطة الحجم
1/2 كوب شعرية
معلقتين سمنة
معلقة ملح وفلفل
شوربة فراخ أو لحمة
مكعب مرقة دجاج "اختياري"
حزمة بقدونس مقطعة قطع صغيرة "للتجميل"
عصير ليمونة "اختياري"

الطريقة:
1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة.

2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي.

3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة" وسيبيهم على النار لمدة ربع ساعة أو لغاية ما الشوربة تغلي، بعد كده هدي نار البوتجاز وسيبيها لمدة ربع ساعة أو لغاية ما تلاقي الخضار استوي اطفي البوتجاز، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون.



***************



سلطة الزباديسلطة الزبادي
المقادير:

3 فصوص مدقوق
علبة زبادي
ورقة نعناع جافّ أو أخضر
خيارة مقطعة قطع صغيرة جداً أو مفرومة
معلقة زيت ذرة
معلقة فلفل أسود
معلقة ملح
معلقة كمون

الطريقة:
حطي علبة الزبادي فى طبق السلطة، وضيفي إليها الثوم المدقوق والخيار والملح والزيت والفلفل الأسود والكمون، وقلبيهم كلهم مع بعضهم كويس، وزيني أطراف الطبق بالنعناع أو رشي على الطبق أوراق النعناع.



***************



بط محشي فريك بط محشي فريك
البط من الأطباق المشهورة جداً في المطبخ المصري واللي كل المصريين بيحرصوا على وجوده على مائدة الإفطار في أول يوم رمضان، وفيه أكتر من طريقة لعمل البط بس إحنا النهارده اخترنا لك الطريقة دي...

المقادير:

1/2 كيلو فريك
1 حبة طماطم مقطعة قطع صغيرة جداً
2 معلقة كبيرة زبدة
3 معالق كبيرة زيت عباد الشمس
3 بصلات مقطعة قطع صغيرة
3 حبات بطاطس مقطعة قطع صغيرة
ملح وفلفل وبهارات
3 بصلات مقطعة شرائح
ورق لاورا
3 أكواب مية دافية
كوب كبير دقيق
عصير ليمونة

الطريقة:
1- هاتي الفريك واغسليه كويس وبعد كده حطيه في المصفاة.

2- هاتي حلة وحطي فيها الزبدة والزيت وحطيهم على النار لغاية ما يسخنوا، وبعد كده ضيفي إليهم الفريك مع التقليب المستمر لغاية ما الفريك لونه يبقى ذهبي.

3- لما تلاقي إن الفريك لونه بقى ذهبي ضيفي إليه الطماطم المبشورة والبصل والبطاطس والملح والفلفل والبهارات، وشوحيهم على النار لمدة 10 دقائق مع التقليب المتسمر بس خدي بالك إن النار تكون هادية.

4- هاتي البطة ونظفيها كويس من جوه ومن بره واغسليها بالمية وبالملح والدقيق والليمون وبعد كده اغسليها بالمية وبعد كده حطيها في المصفاة علشان تصفي كل المية اللي فيها.

5- بعد كده هاتي شوكة واغرسي بيها جسم البطة في أماكن مختلفة بعد كده ادهني قلب البطة بالملح والفلفل وابدئي في حشو قلبها بخلطة الفريك.

6- هاتي صينية الفرن وادهنيها سمنة وحطي فيها شرائح البصل المتبل بالملح والفلفل وورق اللاورا، وحطي عليهم البطة ورشي الملح والفلفل والبهارات على سطح البطة.

7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة.

8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص.

9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر.

10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس.



***************





كنافة بالمكسرات كنافة بالمكسرات
المقادير:

1/2 كيلو كنافة
1/4 كوباية زيت ذرة
1/2 كوباية زبدة أو سمنة
1/4 كوباية عين جمل أو جوز من غير قشرة
1/4 لوز من غير قشرة
1/4 كوباية بندق من غير قشرة
1/4 كوباية فستق من غير قشرة
كوباية زبيب

مقادير الشربات:

1/2 كوباية سكر
3/4 كوباية مية
عصير ليمون
فانيليا


طريقة عمل الشربات:
حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.


طريقة عمل الكنافة:
1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.

2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها.

3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.

4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.

5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق.



***************


وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...

واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..

كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..