وفرى وقتك فى رمضان

رمضان شهر الخير والبركة والعبادة...

شهر بتزيد فيه فرصتنا علشان نكسب حسنات وندعي ربنا ونطهر قلوبنا ونكفّر عن سيئاتنا اللي عملناها طول السنة...

وعلى الرغم إن معظمنا عارف كل ده كويس، لكن للأسف مش كلنا بيعرف يستغل الشهر ده كما ينبغي...

وخصوصاً الستات والبنات اللي بيضيعوا معظم وقتهم في المطبخ علشان يحضّروا كل ما لذ وطاب بهدف إمتاع أسرتهم بعد يوم صيام طويل...

وطبعاً ما فيش شك إن ده هدف نبيل في حد ذاته، لكن زي ما قولنا قبل كده الهدف من شهر رمضان مش الأكل والشرب، لكن الهدف منه هو السعي والاجتهاد للحصول على أكبر قدر من الحسنات بالإكثار من العبادات والطاعات...

وعلشان كده قررنا إننا نبدأ مع بعض من بدري شوية نستعد لشهر رمضان الكريم، وعلى مدار الشهر اللي جاي كله هنعرّف كل ست بيت وكل بنت لسه متجوزة جديد إزاي تقدر توفّق بين إنها تعمل لعيلتها أحلى وأجمد الأكلات، وفي الوقت نفسه تستغل الشهر المبارك صح، وتلاقي الوقت الكافي لقراءة القرآن والصلاة وكمان لصلة الرحم..

وإزاي تستعدي لرمضان قبل ما يبدأ وتكوني جاهزة لأي طوارئ تحصل؟!

خليكِ معانا وتابعينا على مدار الشهر...


حفظ الأكل توفير للوقت والفلوس والمجهود
حفظ الطعام سواء كان خضار أو فاكهة أو عصير أو لحوم أو بقول وغيرها من الحاجات اللي هتحتاجيها في مطبخك وإنتِ بتحضّري الفطار، من أحسن الطرق اللي هتوفّر لك وقت كتير، وخصوصاً لو كنتِ بتشتغلي وعايزة ترجعي من الشغل تلاقي أكلك جاهز على السوى على طول...

وكمان الطريقة دي اقتصادية جداً؛ لأنها هتوفّر لك فلوس كتير، لأنك تقدري تشتري الحاجة اللي إنتِ عايزة تخزنيها في الوقت اللي بتكون فيه سعرها قليل وتحتفظي بها وتستعمليها لمدة طويلة...

والنهارده وإحنا بنحضر لرمضان مع بعض، هنعرف إزاي نقدر نحفظ أنواع مختلفة من الأغذية بطريقة صحية، وفي نفس الوقت توفّر لنا وقت كبير وإحنا بنحضّر للفطار في رمضان...

تعالي نشوف هنحضر إيه مع بعض...



أهم حاجة إنك لما تيجي تشتري الخضار اللي هتحفظيه يكون طازة وسليماحفظي خضارك على التسوية على طول
دلوقتي هاقول لك على طريقة لحفظ الخضار هتخليه يعيش لفترة طويلة في الفريزر، وكمان لما تطلعيه مش هيحتاج أكتر من ربع ساعة على النار علشان يستوي، بس أهم حاجة إنك لما تيجي تشتري الخضار اللي هتحفظيه يكون طازة وسليم.

وفي الجدول ده هتلاقي طرق لحفظ بعض أنواع الخضار اللي ممكن تعملي بها أطباق مختلفة في رمضان:





البامية




بتشيلي الجزء الزائد اللي فيها "يعني تقمعيها"، وبعد كده تغسليها كويس وتسيبيها تنشف، وبعدين هاتي حلة وفيها كمية صغيرة جداً من السمنة ومعاها كمية من البصل المفروم وشوّحي البصل في السمنة، وبعد كده حطي البامية وشوّحيها مع البصلة على النار لمدة 3 أو 5 دقايق، وبعد كده سيبيها تبرد وقسّميها في أكياس بلاستيك، بحيث إن كل كيس يكون فيه الكمية اللي تكفي لوجبة فطار على حسب عدد أفراد العيلة عندك.





الفاصوليا والبسلة




هتعمليها بنفس الطريقة اللي فاتت، بس طبعاً هتنظفي الفاصوليا الأول وتقطعيها لقطع صغيرة، والبسلة هتفصصيها وبعد كده تشوّحيهم مع البصل والسمن على النار لمدة 3 أو 5 دقايق وتشيليهم في أكياس في الفريزر.





الملوخية




هاتي الملوخية وقطفيها واغسليها كويس، وحطيها في مصفاة علشان تصفي ميتها كويس، وبعد كده خرّطيها وحطّيها في أكياس نايلون ناشفة وحطيها في الفريزر.





ورق العنب




هاتي ورق العنب واغسليه كويس، وبعد كده حطيه في مية مغلية لمدة 3 دقائق، وشيليه منها وحطيه في مصفاة يصفي ميته، ويبرد، بعد كده لفّيه في فوطة ناشفة وحطيه في أكياس نايلون، بس اتأكدي إن الكيس ما فيهوش أي أثر للهواء، وبعد كده حطيه في الفريرز.





القلقاس




بتقشّريه من غير ما تغسليه، وبعد كده امسحيه بفوطة نظيفة وقطعيه لمكعبات، وحطّيه في الأكياس وحطيه في الفريزر.





الثوم




خلّي بالك لو هتحفظي الثوم إنك تشتريه وهو جديد يعني يكون طري مش ناشف، وبعد كده بتقشري القشرة الخارجية الموجودة على الرأس من بره؛ يعني مش بتقشريه فص فص، وبعد كده بتفرميه مع كمية صغيرة من الملح وحطيه في أكياس وحطيف الفريزر، بس لازم تتأكدي إنك تقفلي الكيس كويس جداً، علشان ريحة الثوم ما تأثرش على باقي الأكل الموجود في الفريزر.






*************************




الفاكهة عنصر أساسي في قائمة الأكل وخصوصاً في رمضانالفاكهة في ثلاجتك جاهزة لأي طوارئ
الفاكهة من الحاجات المهمة جداً لإنها بتحتوي على نسبة كبيرة من الفيتامينات والمعادن المفيدة والضرورية للجسم، ولازم كلنا نهتم بإن الفاكهة تبقى عنصر أساسي في قائمة الأكل بتاعتنا وخصوصاً في رمضان، لإنها بتعوض الجسم عن الفيتامينات والسوايل اللي بنفقدها طول اليوم...

وفي الجدول ده طرق لحفظ أنواع مختلفة من الفاكهة:





المانجو




يُفضّل إنك تحفظيها على شكل قطع صحيحة، ودي أحسن طريقة لحفظ المانجو، وهي إنك تجيبيها بس خلي بالك إنك تنقيها تكون جامدة مش مستوية أوي، واغسليها كويس وقشّريها وقطعيها لشرائح عريضة، ورشّي عليها عصير ليمون، واحفظيها في أكياس بلاستيك جافة في الفريزر.





التفاح والجوافة




بتغسليهم وتقطّعيهم وترشّي عليهم سكر وليمون، وتحفظيهم في أكياس بلاستيك جافة في الفريزر.





المشمش والخوخ




فبتغسليهم وتنزليهم في مية مغلية وتسيبيهم لمدة ثواني، وبعدين شيليهم وحطيهم في مية مثلجة، وبعد كده قشريهم وقطعيهم، وبعدين رشي عليهم ليمون وسكر، واحفظيهم في أكياس بلاستيك جافة في الفريزر.





الفراولة




بتغسليها وتشيلي الجزء الأخضر منها وتقطّعيها وتحفظيها في أكياس بلاستيك جافة في الفريزر.






والفاكهة المحفوظة بالطريقة دي ممكن تعملي بها عصاير وكوكتيلات مختلفة بإنك تطلعي كيس الفاكهة اللي إنتِ عايزاها من الفريزر وتضربيه في الخلاط مع كمية من المية أو اللبن، وبكده هتحصلي على عصير مثلج فيه قطع صغيرة جداً من الثلج، والطريقة دي بتكون منعشة جداً في الصيف، وكمان ممكن تزيّني بها أي نوع من الكيكات اللي هتعمليها.



*************************




العصاير الجاهزة هتوفر لك وقتالعصير الجاهز هيوفّر لك وقت ويخليكِ جاهزة
ممكن بدل ما تحتفظي بالفاكهة صحيحة إنك تعمليها عصير سواء كان عصير مانجو أو جوافة أو فراولة أو غيرها من العصاير الفريش، وتحطيها في زجاجات بلاستيك، وتحطيهم في الفريزر...

وطبعاً طريقة عمل العصير سهلة ومعروفة، وكل اللي عليكِ إنك تغسلي الفاكهة وتقشريها وتضربيها في الخلاط مع كمية مناسبة من المية والسكر، وبعد كده تصفي العصير لو كان محتاج إنه يتصفّى، وبعد كده تقسّمي العصير على أكياس بلاستيك أو زجاجات بلاستيك زي ما قولنا قبل كده وتحطيهم في الفريزر...

وتقدري كمان تعملي كميات من الكركديه والتمر الهندي والخروب وقمر الدين، وكل العصاير اللي بنحب نشربها في رمضان وتحطيهم في الفريزر، وتطلعيهم قبل الاستعمال بفترة، وبكده يكون العصير جاهز..

ودلوقتي هاقول لك على طرق عمل المشروبات دي:





الكركديه والتمر هندي




أحسن وأصح طريقة لتحضير الكركديه أو التمر هندي، هي إنك تنقعيهم في كمية من المية، وتسيبيهم لمدة يوم في المية دي، وبعد كده تصفيهم، وتاخدي السائل اللي طلع، وحطّي له كمية السكر المناسبة، وحطيه في أكياس بلاستيك أو في زجاجة، وشيليه في الفريزر، وعند الاستخدام ممكن تزوّدي له مية لو كان محتاج إنه يتزوّد.






قمر الدين




بتجيبي لفة قمر الدين وتنقعيها في مية سخنة لمدة ساعتين، وبعد كده قلّبيها كويس، وخدي العصير اللي طلع وحطيه في زجاجة أو كيس بلاستيك مفرغ من الهواء تماماً، وشيليه في الفريزر.






الخروب والدوم




ودي من أحسن العصاير اللي ممكن إنها تتشرب في رمضان، وبتكون لها تأثير مرطب ولذيذ في الحر لما بتتشرب باردة، وطريقة عملهم متشابهة، وكل اللي عليكِ إنك تجيبي الخروب أو الدوم مطحونين من عند العطار، وتحطيهم على النار ومعاهم كمية من السكر تساوي كمية الخروب أو الدوم اللي هتعمليها..



يعني لو هتعملي كوبايتين خروب بتحطي معاهم كوبايتين سكر، وبتسيبيهم على النار لغاية ما تحسي إنهم بقوا شبه الكراميل شوية، وبعد كده ضيفي عليهم المية، بحيث إنك لو هتحطي كوب واحد من الخروب، تضيفي عليهم 3 أو 4 كوبايات مية، وسيبيهم لغاية ما يغلوا على النار وبعد كده شيليهم من على النار، وسيبيهم لغاية ما يبردوا وبعد كده صفّيهم، وقسّميهم على أكياس أو زجاجات بلاستيك وشيليهم في الفريزر.